الاثنين، 28 مارس 2011

المــــارد



 المارد طلع من مصباحو
والوطن بدأ صباحو
والمظلومين فاقو وصاحو
والجندى مسك سلاحو
والفلاح بدأ كفاحو
واللى خايفين للسر باحو
واليمام على الأ يك ناحو
على الشهداء اللى راحو
نجوم فالسماء لاحو
ومن عطر الجنة فاحو
ولمملكة فرعون طاحو


واخيرا طلع المارد
بعد ما كان شارد
مارد لتاريخنا شاهد
لأحلامنا وامانينا قائد
ولتحقيق العدل قاصد
وقلبو جرىء وجامد
ويكون لكل طماع راصد
وبيد العون يساعد
ضربته قوية لكل فاسد
ومهما غاب لابد من انه عايد


مارد بعيد قريب
يميز ما بين الصح والعيب
يجى فجأة ودون ترتيب
ولا يخاف من سبع او ديب
يحقق اى شىء ولو عجيب
زى الحاوى يطلع معجزات من الجيب
واصلو قريب منا ومش غريب
وللأبطال صاحب وحبيب
طويل العمر ولا يعرف الشيب


مارد لسبع امانــــــــــى
اولها بالرضا يملانى
يرفع فوق السحاب اوطانى
تبقى لياليها اعياد وتهانـــــــــــــــى
ولا حد فيها يعانـــــــــــــــــــــى
تبقى جميل جمـــــــــــال ربانى
صوتك بديع وتشدو اغانـــــــــــى
والحب ينبض فقلبك الجوانى

وجلال الرب اللى سوانى
والكل من بعد وجهه فانى
بلدى متشفش بعد كدة هوانى
ومش هنستعبد ونتورث تانى


مين قال الشهيد مات
يابختو فوق السبع سموات
ربنا راضى عنه وبيلقى عليه الصلوات
وملايكة ترمى عليه سلامات
الشهيد دلوقتى ابن زوات
يغفرلو ربنا كل اللى فات
ويروح ويجى فى الجنات
وجاره الحبيب نبى الرحمات
ارتاح والله من دنيا ومتاهات
لجنة خضرا يطير فيها بجناحات


سلام من النبى موسى
لشباب يستاهل الف بوسة وبوسة
والله ياولاد مصر رجعت عروسة
زفة وزينة وفرحة وهيصـــــة
اصل حالتها كانت عويـــــــــــــــصة


سلام من عيسى المسيح
الملك الباطل لايقاوم ريح
والحق قولو واضح صريح
والحق دايما يصرخ ويصيح
وطن حر جميل مريح
واسع ودافى وفسيح
الكل كان ناسى وميـــــــــح
انه لايصح الا الصحيح

سلام من النبى المختار
وانكشفت للعالم الاسرار
انه ميقدرش على الحق اى جبار
وان افتكر انه يقدر يبقى اكبر حمار
ثورتنا حولت اليل لنهار
ولا بد فيوم انه يطير الطيـــــــــــــــــار
بلدنا بينا تصبح عمار
شبابها فشبابنا دول الازهار
اللى مرضيش بالذل والعار
وكلنا لينا فالسياسة وبقيت كار
اصل مصر لينا كلنا دار
ولو هكتب فى حبها اشعار
عاوز حبر بحار ضعفها ابحار


وافتكرو مارد الثورة
بيطلع من غير لف ولا مناورة
ويسترنا ويدارى العورة
ويتمم فى الدنيا الدورة

دا مارد ثورة يناير
خلى الشباب يطلع ثاير
وعلى وشو القبول والبشاير
لما كان غضبان وحر وفاير
ولا حد تانى يتهان ولا يعاير
انا حر حاسس بانى طاير
بلدنا بتفك الضفاير
بتلبس لبسها وتزرر الزراير
وبتفرح بشبابها اللى عليها غاير
وفدرب حبها ساير
وفنــــــــــــــار عشقها حاير
يحميها من كل ظالم ومن كل جاير


بنت مصر بميت راجل
وشبابها رزين وعاقل
ولهمها مهموم وشايل
مادام القلب ليها مايل
وحبها مخلوط بالدم اللى سايل
يهون فداها اى شىء هايل
لو علشانها اموت فانا قابل
علشان اكون لرضاها طايل

المصريين كلهم عيلة
بدايتها من الموحد مينــا
مصر هية بيتنا واهلينا
يعنى كلنا مننا فينا
فى وقت الشدة تشهد عننا سينــا
فى وقت الحب يشهد عننا النيــل اللى بيروينا
فى وقت الفرح تشد عننا حوارينــا
فى وقت الحزن قلوبنا على بعضينا
فى وقت الشوق تشهد عننا موانينا
فى الكنيسة والجامع صلينا
وزرعنا اراضينا بايدينا
ولبناء مصر نوينا
بالزمة فى احلى من ليالينا

ليست هناك تعليقات:

إرسال تعليق