الاثنين، 28 مارس، 2011

غيــــران




يابلدى انا عليكى غيران
وقلبى قايدة فيه نيران
ويطلع من جوفى دخان
يابلدى انا فى حبك حيران
والدنيا شايفها بلون بهتان
بعد ما كانت كلها الوان
الكل بيحبك فلان والاخ علان
وناس من برة بتعشقك كمان
فالأول وفى الاخر انا انسان
وحالتى يعرفها الجهلة والكهان
يعرفها البصير واللى عميان
عاشقك وكل عاشق فى البعد مهان
عاشقك وانتى لابسة فستان
عاشقك وانتى بترقصى وسط بستان
عاشقك وانتى لابسة عقد من مرمر ومرجان
عاشقك وعشقى ميعرفهوش انس ولا جان
عاشقك بجمالك الفتان
سبحان الله العلى المنان
عاشقك وغيران وحيران وزعلان

وانا ايه ذنبى
لما اكون عايزك لية لوحدى
ولا حد يحبك أدى
هو عيب اغير على حبيبتى
واكون عايزها من نصيبى وحظى
وعايزها تحس بعشقى وحبى
وتحس بنارها اللى قايدة فقلبى
تسمع ندايا وتسمع حسى
ويوصلها لحنى وشعرى ونثرى
وقلبها هيكون هو بيتى وقصرى
ونظرتها ادفع علشانها عمرى


والله بحبك يا مصر
ووعد منى ادفعلك اغلى مهر
وابنيلك من الدهب قصر
وشهر العسل يبقى الف شهر وشهر
افديكى ودمى يبقى فيكى تانى نهر
مش هتشوفى ظلم ولا ذل ولا قهر
مصر فوق الزمان وفوق كل دهر


مصر قالت اسمع ردى على اقوالك
يا ابنى افهم دول اخواتك
والشهداء دول اسيادك
انا عمرى ما كون من املاكك
انتى ملكى انت واللى جابك
شيفاك وحاسة با اوجاعك
سمعتك انا وسمعت انين عذابك
انا من قبلك من ايام اجداد اجدادك
وهعيش بعدك لايام احفاد احفاك
حبنى وانت وسط لمة اصحابك
وسط شعبك وسط اهلك وسط ناسك
فرحتى هية شغلك وعرضى هو عارك
عدوى عدوك وتارى هو تارك
مهرى هو ارضى تخضرها بأفكارك
سعادتى هو ابنى لما تاخدو  بين احضانك
تلقانى جنبك سواء ففرحك او فى مرارك
تلقانى سامعة كل شكاويك واسرارك
لما تخاف علية ليلك نهارك
وتبنينى بسواعدك واعمالك
وتفنى فى حبى  فوق العمر اعمارك
انا كمان بغير عليك وعلشانك
لما الاقيك بعيد عن شعبى وأوطانك
انا كمان بحبك لما اكون على بالك
وبتمنى من الله يكتر من امثالك

قلتلها يامصر انا فين وانتى فين
انا فى الاساس مين
وسط اللى بيحبوكى ملايين
وانا واحد وحيد مغمور حزين
هروح فين وسط المحبين
والقلب ميشلش اتنين
حالتى بقيت زفت وطين
لما طمعت انا فنظرة عين
وانى اكون فزمرة العاشقين
حبك علية واجب ودين
مهما طالت الازمان والسنين
حرارة حبك لا يصيبها برود او لين
هصبر والبشرة للصابرين
ومش هابقى انانى وهابقى راضى امين

قالت مصر يا ابنى بطل غيرة
ما انا الاولى والاخيرة
حاول يكونلك دور وسيرة
كون نفسك ومتكونش تقليد وعيرة
ولا يغرك مال سواء جنيه او ليرة
خليك جنبى فى السرور وفى الحالة الخطيرة
بحب قبل الغنى الناس الفقيرة
بحبك لو انت منسى قبل الناس الشهيرة
بلدك يا واد كبيرة مش صغيرة
عارفة وواعية وفاهمة وبصيرة

كلمة يامصر قريتها فى التاريخ
سمعتها من قس  وسمعتها من شيخ
ثوار كنت فاكرهم سكان المريخ
اللى علشان بلدو ينشوى بالسيخ
ولا ينذل ولا يتهان ولا ينيـــخ
شبابك يابلدى عمرو ما يشيـــــخ

رضيت انا وهفضل راضى
ومش هبقى فى حبك انسان عادى
طول ما انتى مزروعة فى فؤادى
انا ههتف بلادى بلادى
وهعبرلك عن اللى فبالى
وفيوم يا بلد هبقى شهيد
والله يابلدى  دا يوم عيد
هجيلك يابلدى بقلب حديد
لا اخاف من عبد ولا سيد
ولا هلبسلك  لبس جديد
واهرجع لحضنك رجوع حميد







هناك تعليق واحد:

  1. بجد جميلة اوى انا كل لما اقول هاخد الجزئية دى كاقتباس الاقى اللى بعدها شدتنى ليها اكتر واكتر وعلى كده لغاية لما وصلت للآخر تعبت بجد مش لاقية حاجة كده اقتبسها خالص لانى كده هاخد القصيدة كلها

    حب الوطن فعلا لا يضاهيه اى حب فى العالم لانه انقى انواع الحب بنعمل عشانه كل شئ ومن غير مقابل او انتظار انه يرد لينا الجميل ..يارب يحمى لينا بلدنا ويجعلها دايما عزيزة

    تحياتى لك

    ردحذف