الاثنين، 28 مارس 2011

أول مــرة.....



 أول مرة احس شعور
           انى طاير زى العصفور
           انه بقالى كلمة ودور
           أول مرة اشوف النور
          بعد سنين ظلم وجور
          مش هخاف وأنام مذعور
           ولا هبقى تانى عبد المأمور
            أول مرة فاهم ودارى
           أول مرة مش طرطور
          بلدى قالولى أنها بور
           كذب خداع وشهادة زور
          واللى يقول فى حقها كلمة
             لازم يرحل لازم يغور

           أول مرة ياحضرات السادة
             مصرى حر ولية ارادة
           محدش فية يمارس سيادة
           ليه صوت وليه ريادة
           ناس حولية نالت شهادة
           علشان نعيش فهنا وسعادة
             والخير فايدينا يبقى زيادة
            عندنا جورج زى حمادة
               ودا للعلم وللافادة

           أول مرة اكون ايجابى
         وأفكر فمستقبل ولادى
        وابطل كلمة ماشى وعادى
            وفالحق زاد عنادى
             طاير بلبل شادى
          بطلب بحقى وقوتى وزادى
         يادى صباح الوطن النادى
          زاد فقلبى لبلدى ودادى
         يابلادى انا بحبك يابلادى

              أول مرة انا بختار
           وقال ايه انا محتار
            والسياسة بقيت كار
         ا سمع كمان النبأ السار
          حاسس مصر لية دار
          مش غريب وفيها عالة
         مصرى ياناس ومن الاحرار
             عمار يامصر عمار
           دايما بلد الجدعان الثوار
             كنت فاكر انى من الكفار
           او قال ايه هدخل النار
        لما اقول دى بلدى ياخلق
          ليه فيها صوت وقرار

            اول مرة اروح تصويت
           من غير لطم ولا صويت
          انا بصوتى خلاص قويت
          انا على الثورة اتربيت
         مش هقول زمان وياريت
         ياما زمان من الظلم انكويت
        وزلونى واتهديت واستويت
          صوتى هيجلل ومش هسكت
         من يوم ما على الحرية ناديت

              أول مرة ومش اخرها
            هى بلدنا ملناش غيرها
            هى بلدنا نقودها نديرها
           احنا صوتها احنا ضميرها
            احنا اولى الناس بخيرها
           احنا مستقبلها ومصيرها

هناك 6 تعليقات:

  1. اول مرة ازور الديوان

    واكون كده بيه فرحان

    ومش لاقية بجد اى تعليق اقوله على جمال الديوان وياربن ان شاء الله قريب اقرأ كل البوستات المميزة دى فى كتاب ديوان كامل لحضرتك

    تحياتى لقلمك

    ردحذف
  2. شكرا جزيلا على ثنائك الجميل
    تحياتى لكى

    ردحذف
  3. تحياتى لقلمك الذى يقطر طربا يسحر قارئيه والحقيقة اننى اكون سعيدا عندما اصادف شعراء على مقدرة تدانىى جزاءا وفاقا لما نرسله من انثار واشعار

    ردحذف
  4. الأخ / فيلسوف زمانه

    مدونة جميلة ... روحها مرحه ... تحياتى لشخصكم الكريم ... تقبل مرورى وإشتراكى ودمت بكل الود

    تحياتى

    أخوك / تامر

    ردحذف
  5. شكرا لكم كثيرا
    فثنائكم جميل على روحى خفيف لطيف
    شكرا جزيلا
    تحياتى العطرة لكم

    ردحذف